தினம் ஒரு கோபுர தரிசனம்

இன்றைய கோபுர தரிசனம்...

அருள்மிகு வலம்புரி சித்தி விநாயகர் கோவில், மும்பை, மஹாராஷ்டிர மாநிலம்,

முதல் கடவுளான விநாயகருக்கு மிக பிரமாண்டமான கோயில் உள்ள இடம் மும்பை. சித்தி விநாயகராக மக்களுக்கு அருளும் சித்தி விநாயகரை தரிசிக்கக் கூட்டம் தினமும் அலை மோதும்,

அனைத்து மக்களும், எல்லா VIPகள், VVIP களும் விசேஷ நாட்களிலும் தங்களது புதிய ப்ராஜெக்ட்கள் ஆரம்பிக்கும் முன்னரும் தவறாது வந்து வழிபடும் கோவில் இந்த வலம்புரி சித்தி விநாயகர் கோயில், மும்பை.

திருவிழா:
விநயாகர் சதுர்த்தி, சங்கடஹர சதுர்த்தி, ஸ்ரீ சத்ய நாராயண பூஜை, பஞ்சாமிர்த பூஜையோடு, ஒவ்வொரு நாளும் இரவு 7.30 மணிக்கு நடக்கும் தீப ஆரத்தி மிக சிறப்பானதாகும்.
ஒரு வருடத்தில் இரண்டு முறை மட்டுமே செவ்வாய் கிழமைகளில் சங்கடஹர சதுர்த்தி வரும். இதை அங்காரக சதுர்த்தி என்பர். அந்த நாளில் விநாயகரை தரிசிக்க லட்சக்கணக்கில் பக்தர்கள் கூட்டம் குவிவது வழக்கம்.

கோயிலின் சிறப்புகள்:
இந்த கோயிலில் உள்ள சித்தி விநாயகர், மற்ற கோயிலில் உள்ள விநாயகரைப் போன்று இல்லாமல், இடது பக்கம் தும்பிக்கைக்கு பதிலாக, வலது பக்கமாக தும்பிக்கையை வைத்துள்ளார், இந்த கோயிலில் உள்ள சித்தி விநாயகர்.

வேண்டுதல்கள் :
நோயின்றி ஆரோக்கியமாக வாழவும்,எடுத்த காரியங்களில் வெற்றி பெறவும், தடைகற்களை படிகல்லாக மாற்றவும், குழந்தை வரம் தரும் சக்தி வாய்ந்தவராகவும், இந்த சித்தி விநாயகர் திகழ்கின்றார்.
வேண்டியது நிறைவேறினால், கோயிலுக்கு வந்து விளக்கேற்றி, எருக்கம்பூ, இலை மாலையை அணிவித்து பிரார்த்தனை செய்கிறார்கள்.

கோயில் பெருமை:
தூரத்தில் இருந்தாலும் இந்த கோயிலின் கோபுரம் தெரியும் வகையில், மிக உயரமாக, 5 அடுக்கு கட்டிடமாக கட்டப்பட்டுள்ளது. கோயிலின் கருவறைக்கு மேலே சுமார் 12 அடி உயர, தங்க முலாம் பூசப்பட்ட பெரிய கலசம் உள்ளது. மற்ற கலசங்களில் சிறிய கலசங்கள் அமைக்கப்பட்டுள்ளன.

இந்த கோயிலில் உள்ள கணபதி விக்கிரகம் ஒற்றை கருங்கல்லால் ஆனது. இரண்டடி உயரம், இரண்டடி அகலம் கொண்ட இந்த கணபதியை மராட்டியில் நவசாக கணப்தி, நவச பவனார கணபதி என அழைக்கின்றனர்.

மிக நவீன கோயில் பாணியில் கட்டப்பட்டுள்ள இந்த கோயிலில் உள்ள மடப்பள்ளியில் தயாரிக்கப்படும் பிரசாதம், பிரத்தியேக லிஃப்ட் மூலம் கருவறைக்கு எடுத்துச் செல்லப்பட்டு, அர்ச்சகர்களால் கணபதிக்கு படைக்கப்படுகின்றது.

இந்த சித்தி விநாயகர் ஆலயத்தில் ஆஞ்சநேயருக்கு என தனி சன்னதி உள்ளது.காவி நிறத்தில் அழகிய மண்டபத்தில் வாலை உயர்த்திய படி அனுமன் அருள்பாலிக்கின்றார்.

1952ம் ஆண்டு சயானி சாலையை விரிவுபடுத்தும் போது பூமியை தோண்டிய போது இந்த ஆஞ்சநேயர் சிலை கண்டெடுக்கப்பட்டது. இந்த சிலையை கோயில் தலைமை அர்ச்சகர் ஸ்ரீ கோவிந்த் பதக் என்பவர் மூலம் இந்த கோயிலுக்கு கொண்டுவரப்பட்டது.

கோயில் வரலாறு:
மும்பை வாசிகள் விநாயகர் மீது அதீத பக்தி கொண்டவர்கள் என்பதை இந்த கோயிலுக்கு வந்து பார்த்தால் தெரியும். இந்த கோவில் 500 ஆண்டுகளுக்கு முற்பட்டது என கூறப்படுகின்றது.

மும்பையில் வசித்த தியூபாய் பாட்டில் என்ற பெண் குழந்தை வரம் வேண்டி ஏங்கினார். தனக்கு குழந்தை பிறந்தால் விநாயகர் ஆலயம் கட்டுவதாக வேண்டிக்கொண்டார். ஆனால் எதிர்பாராத விதமாக ஒரு நாட்டை காக்கும் போரில் அவரின் கணவர் காலமாகி விட்டதால், அவரின் வேண்டுதல் பலிக்கவில்லை.

இருப்பினும் அவரின் விநாயகர் ஆலயம் கட்ட வேண்டும் என்ற ஆவல் மட்டும் குறையவில்லை. அவர் வைத்திருந்த நாட்காட்டியில் உள்ள விநாயகர் திருவுருவம் போல விக்ரகம் அமைய வேண்டும் என விரும்பினார். ஆனால் அது பாங்காங்கா வாக்லேஷ்வரில் உள்ள விநாயகர் விக்ரகத்தை ஒத்திருந்தது. அந்த கோயில் 700 ஆண்டு பழமையானது.

ஒருநாள் தியூபாய் பாட்டில் விநாயகரை தரிசிக்கும் போது ஒரு வேண்டுதல் உதயமானது. இந்த முறை தனக்காக அல்லாமல், தன்னைப் போன்று குழந்தை இல்லாமல் வருந்தும் பெண்களுக்கு குழந்தை வரம் அளிக்க வேண்டும் என்று வேண்டிக் கொண்டார். இந்த கோயிலை காலம்சென்ற திரு லக்‌ஷ்மண் விது பாட்டில் கட்டினார்.

சித்தி விநாயகர் சிறப்புகள்:
இங்குள்ள சித்தி விநாயகர் 2 அடி, 6 அங்குல உயரம், 2 அடி அகலமும் கொண்டது. மற்ற விநாயகர் கோயிலில் உள்ளது போன்று இல்லாமல், இந்த சித்தி விநாயகர் தனது தும்பிக்கை இடது பக்கம் வைத்திருப்பதற்கு பதிலாக, வலது பக்கம் இருப்பது மிகவும் சிறப்பு.

இந்த விநாயகரின் வலது கயில் தாமரையும், இடது கையில் கோடரியும் தாங்கி இருக்கின்றார். கீழே உள்ள இடது கையில் ஒரு கிண்ணம் நிறைய மோதகம் உள்ளது. வலது கீழே உள்ள கையில் துளசி மணி மாலை வைத்துள்ளார். இவர் எப்போதும் பரமாத்மாவை நினைத்து தியானத்தில் இருக்கிறார் என்று கூறுகிறார்கள்.

விநாயகர் பூணூலை ஒத்த ஒரு பாம்பு உருவம் பூணல் போன்று பொறிக்கப்பட்டுள்ளது. இவை எல்லாவற்றையும் விட விநாயகரின் நெற்றியில் கண் உள்ளது மிக விசித்திரமாக பார்க்கப்படுகின்றது. நெற்றிக்கண் கொண்ட விநாயகரின் காலடியில் பளிங்கால் ஆன இரண்டு தேவியர் உள்ளனர். விநாயகரின் இருபுறமும் சித்தி மற்றும் புத்தி என்ற இரு பெண் தெய்வங்கள் உள்ளன.

இவர்கள் விநாயகரின் பின் பகுதியிலிருந்து முளைத்து இருப்பது போன்றும், வளைந்து முன்பகுதியில் காட்சியளிக்கும் வண்ணம் விக்ரகம் அமைந்துள்ளது. இரு பெண் தெய்வங்களுடன் காட்சி அளிப்பதால் இந்த விநாயகர் சித்தி விநாயகர் என அழைக்கப்படுகின்றார்.

கோயில் திறக்கும் நேரம் :
தினமும் காலை 6 மணி முதல் இரவு 10 மணி வரை திறந்திருக்கும். ஒவ்வொரு செவ்வாயும் அதிகாலை 4 மணிக்கே திறக்கப்பட்டு, இரவு வரை தரிசனம் நீடிக்கிறது.

கோயில் முகவரி :
அருள் மிகு சித்தி விநாயகர் ஆலயம்,
எஸ்.கே. போலேமார்க், பிரபாதேவி
மும்பை - 400028
தொடர்புக்கு : +91 22 2437 3626

இது ஆன்மீக பூமி,

சித்தர்களும்,மகான்களும், மகரிஷிகளும், முனிவர்களும்,யோகிகளும், நம்மை நல்வழி நடத்தும் மகா குருமார்களும், இன்னும் பிற தவஷ்ரேஷ்டர்களும், வாழ்ந்த, வாழ்ந்து கொண்டிருக்கும் மண்.

ௐ ஶ்ரீ மஹா கணபதயே நம: